خْذِاوْ لْعِبْرَة
نْفَضْو لْغَبْرَة
عْمَارْ الجُّوفْ
طَارْ لْخُوفْ
خْرَجْ لَكْلاَمْ
قْوَاتْ لْهَضْرَة
فْ لَمْحَةْ بَرْقْ
خْرَجْ لْخَلْقْ
بْدَاتْ الجَّذْبَة
بْدَاتْ لْحَضْرَة
هَاجْ لْمَجذُوبْ
قْرَا لْمَكْتُوبْ
فَكّ الشَّفْرَة
كْثَرْ التْحَنْزِيزْ
بْدَا النْغِيزْ
شَعْلَتْ جَّمْرَة
زْنَدْ لْفاخَرْ
دْخَلْ الضَّاسَرْ
تْهَرّسْ الجَّاجْ
نَاضْ لَعْجَاجْ
الرّْشِيقْ بْ لْحَجْرَة
گْدَاتْ النَّارْ
بَنْكَا وْمَتْجَرْ
تْرُوّنْ لَقْصَرْ
كُولْشِي يَنْهَبْ
تْرُوَّعْ الشَّعْبْ
حَسّْ بْ لْحُگْرَة
خْطَبْ لْحَاجْ
هْمَدْ لَعْجَاجْ
نْعَسْ الدّْجَاجْ
زَالْ الطْشَاشْ
سَمَّا لَوْبَاشْ
بْدَا لَفْتَاشْ
وْقَعْ التَّرْيَاشْ
شْرَعْ لَحْصَادْ
بْدَاتْ لْقَهْرَة
جمْعُو لْغَلَّة
كُلْهَا فْ سَلَّة
اللِّي دَارْ وُاللِّي تْفَلاَّ
اللِّي تْزَرَّفْ وُاللِّي تَّبْلاَ
تَرْكُو الطَّفْلَة خَلاَّوْ لَمْرَا
هَزُّو لَعْلاَمْ نَطْقُوبْ لَحْكَامْ
مَنْ خَمْسْ سْنِينْ لْ عَشْرِينْ عَامْ
هَاذِي حْكَايَةْ الْكُومِيرَة
كِيَّةْ اللِّي جَاتْ فِيهْ يَّامَاتْ الصَّهْدْ
اللِّي ِتْعَذَّبْ وُللي تَّرْهَبْ
اللِّي تَّعْطَبْ وُاللِّي تَّفْقَدْ
هَاذْ لَبْلاَدْ حْرِيرْتَا حْرِيرَة
اللهْ يْسَامْحَكْ يَا !!؟ الْكُومِيرَة
كُنْتِي زَايْدَة شْوِيَّة خْمِيرَة
تعليقات:
