مُولاتْ الخالْ

  فلْعـْــــلالي سمَّاك العـــالي
وفالسَّلم العَلـــِي حَبْلَكْ طَـوَّالْ
مْيَّاهْ هَلاَّلة فْمجـاريها تْـــلالي
مْرايا فيها يْتْبَسَّـمْ لْهْـــــلالْ
فوق الجَّبْهة مَنْها مَشْبـــــوحْ
وفوقْ الصَّدرْ شَـــــــلاَّلْ
نَغْماتْ تْطلع من قَلْب الـــرُّوحْ
وتْفيقْ  بها لْعقولْ مَنْ لَهْــــبالْ
موجاتْ تْضَرَبْ فْشَطْ الـعَز وتْروحْ
ويْسْطع رْذاذها يَسْحَر كُلْ جَــوَّالْ
أرْضْ مفروشَة بالمَسْك به لْرْياح تْفوحْ
والنْدى يْنادي فْكُلْ نادي نـــزَّال
غَمُّو فَقَلْب العْدا مَطـــــروحْ
يْعيا يْذَمْ لْســانو بْطـــــالْ
يْدَركو السَّافَلْ فْكُـلْ دَرْك مَلْـيوحْ
تْباعْ فيه الباطل لا مَْن يْقولْ شْحالْ
الخير باني دَوْلة فالـــــدْوالي
و مْطامَرْ تْمورْ بالغْـــــلالْ
مْزَّينْ مْساها يْنَسِّيني خْبــــالي
و مْزَّينْ عَزها تْعَزَّزْ ْفالحْـــلالْ
يْجيكْ السَّايَحْ مَنْ كُلْ ثْلثْ خالي
نْمَيَّلْ لْمُوَّّالْ فمولاتْ الخالْ ومـالي
ونَْنشَر لْمَسْك  فليــالي لْفضالْ
نْجوبْ الجَنوبْ طالقْ جْـــلالي
و يتشَرَّف بْمقامَك كُلْ شْمــالْ
حُبَّكْ يا بْلادي ساكَنْ دْخــالي
واللِّي فالقَلْبْ عَلْســـانْ يْتْقالْ
عَوْدَكْ مْجَهَّزْ بالسَّرْجْ الغـــالي
يْخَيَّلْ فالخَيَالْ مْعَ كٌلْ خْيـــالْ
هَكْذا سَوَّاكْ العالَمْ العــــالي
وفَضّْلَكْ بالفْضايِلْ ومــــازال...