صاحَبْتْ لْبْحَرْ وبْما فِيَّ غْنِّيــتْ
وشْكيتْ لْصْخورو ما خْفاتْ دْخالي
مْعَ كُلْ موجَةْ ضْرَبْتْ ووَلِّيــتْ
وشْكيتْ للرَّمْلَةْ حْتَّى بْكاتْ لْحالي
***
البارَحْ فْحُلْمْ جْميلْ شْفْتَكْ ياسيدي
طالَعْ كيفْ شَمْسْ الصْبــــاحْ
لكنْ ما خْذيتْ كْثيرْ مَنْ وَقْتَــكْ
خْيالْ لاحْ بْكَلْماتْ مْخالْفَةْ وراحْ
اللَّه عْليكْ وْجَهْ فْعَزْ اللِّيلْ جـاني
حَوَّمْ عْلَيَّ هُوَّ ولْفْجََرْ سْتـــورْ
رْمى إيزارْ مَنْ بَرْدو وخَبَّـــاني
وخْلَّى اللَّوْعَة فِيَّ بالنَّارْ تْفـــورْ
جاتْ صورْتَكْ ثاني مَكْمـــولَةْ ياسيدي
وجْهَك نهار فْلِيلْ الدنيا مَرْســولْ
الكلمة نورْ بالحق مَغْســـولَةْ
هِبَة رَبَّانِية حارَتْ مْعاها لْعْقــولْ
سْفينَةْ القول رْكَبْتْ وْبِيَّا مْشـاتْ
ذنوبي مْعايَ تكاثروا مَيْلوها ومـالو
مَحْبوسَة الصَّرْخَةْ قَوْلوني و قــالو
خْباري رْحَّالَة فْكُلْ جِهـــاتْ
و سْكاكَنْ الوَجْدْ فْيَّ جـــالو
وتْعَلاتْ صورَتك نورانية يا الشَّافَعْ
وتْمَسحات من القلب كُلْ الصوراتْ
***
صاحَبْتْ لْبْحَرْ وبْما فِيَّ غْنَيَّــتْ
وشْكيتْ لْصْخورو ما خْفاتْ دْخالي
مْعَ كُلْ موجَةْ ضْرَبْــتْ ووَلِّيتْ
وشْكيتْ للرَّمْلَةْ حْتَّى بْكاتْ لْحالي
وصْحاتْ لعقولْ وأَنا عَقْلي مْهَـوَّل
مْشى بْيَّ ليْالي فْكُلْ حَزَّةْ مْشْـوارْ
يا ريتْني فالهْوى كَنْتْ اللَّـــولْ
ويا ريتْني للجايِّين ما جَبْتْ لعــارْ
وهاأَنا اليومْ خْطايَ فالعْمَر مَحْسوبَةْ
عَوْدْ الشَّبابْ رْماني سار وخَلاَّني
قْصْتي فْكْتابْ المُذْنِبين ضْحات مَكْتوبَة
فْحْروفَها قْرا ذَنْبَك وحْدكْ ونْساني...
***
رْماتْني مَّاجَكْ يا ذنـــوبي
وبَحْرَكْ بي ضـــــاقْ
لْظُلْمَة خْيامْها بْالنّْهارْ مْرْخِيَّـةْ
عَمْتْ ودْموعي مْلْيانَةْ لْحْداقْ
فْريدْ رْكَبْتَكْ أيا بْحَرْ والرِّيحْ عْصِيَّةْ
وشْرَبْتْ مَنْ كاسْ لْأَوْهامْ جَرْعاتْ
زادتْني لِيَّامْ كيسانْ وكانَتْ سْخِيَّةْ
حْتَّى فاضَتْ مْنِّي مْرورْتْها وطَلْعاتْ
وتْعاشْرتْ فِيَّ لْبْلاوي مَنْ كُلْ لَوْنْ سْمِيَّةْ
***
رَكَّبْني شيطاني عَوْدْ بْلا لْجامْ
ودَّاني لْحَرْبْ ما لِيَّ فيها وْزيعَةْ
جَرَّبْتْ نْغَنِّي لو يْرَجْعني بْسْلامْ
طَوَّفْني بُلْدانْ كُلْها خْديعَـــةْ
ها أنا اليومْ فْشْباَكْ البارَحْ مَرْمي
التوبة هَمِّي والمعاصيْ عْلِيَّ تْلَمُّو
بالنْهارْ نْعْطي عْكَّازي لْذَنبْ مْعْمي
يْجينِي بْاللِّيلْ هايِمْ هُوَّ و ْوَلْدْ عَمُّو.
***
و فْكُلْ لَحْظَةْ عَقْلي ســــارَحْ
يْعَلِّي و لْسَّمَواتْ العالية يْتَبْعوهْ بالقيلْ
حالي حال الشَّمْسْ تْطْلَعْ كُلْ صْباحْ
والطيرْ يْصدحْ غَنَّاي فْعَزْ الرْبيــعْ
أَ مالْكي أَنا قْدَّامْ بابَكْ جايِبْ لْمْداحْ
أمالكْ حالي رْحَمْ راني ببابك يافَتَّاح
وْكلامي رْسولْ على عَوْدْ سْريـعْ
راني فْظلالك ونورانَك
والعَبْد عند ظَنُّو بيك فْقَلْبْ الرَّحْمَةْ بْلا تَوديعْ...
تعليقات:
